لحظة فضفضة شنيعة من اول ايام صيف 1430

طااااااااااااااااااااااااااااااقّة من البيت .. طفشانة .. ودي اسافر مكان هادئ مافيه احد ..

ابغى مكان هادئ .. ابي اروح جزيرة في آخر المحيط الهادئ مافي ولا احد بس مدة من الزمن
عشان اجمع شتات عقلي الذي تشتت من بعد الجامعة والاختبارات والهم والغم :(


الا تدرون وشي آخر احلامي :

نفسي اسافر ريف من الارياف النمساوية الاوروبية السويسيرية الزفتية .. اي ريف يفتح النفس
واعيش في بيت على تله لحااااالي مدة اقصاها اسبوعين عشان ما يسير لي انفصام شخصية :(
ويكون جدولي خلال هالاسبوعين كالآتي ..

الفجر اقوم واصلي اللي يكتبه الله ثمن اقوم اشم هوا خارج بيتي المتواضع ثم انزل من التله واذهب الى سوق القرية
واشتري الغريضات عشان الفطور .. وارجع واطلع التلة الى بيتي واطبخ فطوري وآكل ..
ثم اخرج من البيت اتمشى في الريف ومعي كتاب واشم الهواء النقي
واتفرج على الماعز المترامي الاطراف واسلم على هايدي من جهة وعلى بيتر من الجهة الاخرى ^*
ولا بأس ان سيرت على جدها اسلم عليه ^^
وبعد ما اقرأ كتابي حان وقت الذهاب الى البيت وتجهيز الغداء ..
انزل من التلة على السوق واشتري الغريضات وارجع اطبخ الغدا وبعدها انام قيلولة ..
يأذن العصر: اشرب الشاي .. وبعدها انزل السوق اتبضع واتفرج ع الناس ازور اي احد من الناس اتعرف على اي احد من الناس
اذا فيه ناس مزايين اتمقل فيهم واتعرف عليهم >> عيب يابنت . ... بس فيه مشكلة شلون بتكون لغة الحوار بيننا
يسير لازم نقوي لغتنا الانجليزية عشانها لغة العصر :)
المهم بدأت الشمس في الغروب . اتأمل غروب الشمس من ورا التلال الخضراء البهيجة
وأدخل على بيتي واجهز النقانق اللي انا شاريتها من السوق واشغل التلفزيون عشان موعد عرض الفيلم
وبعدها اقوم انظف بيتي اغسل الملاب واسوي اي شي الى وقت العشاء ..
اتعشى واعبي بطني .. والى النووووووووم

وكذا تستمر ايامي الى اسبوعين او عشر ايام ..

بعدها اروح على احدى المدن الونسة الفلة . . اما لندن او روما او باريس .. لسه ما حددت ^^
وهناك التسوق والفلة والاصدقاء والاستهبال وسينمااااااا وبوب كورن ومبارة بيسبول
وياسلم سلممممم ^^
ماقررت قد ايش اجلس في تلك المدينة الرائعة يمكن شهر وحولها حيث الخيارات الترفيهية اوسع ..

بعدها يكون هل رمضان وانا حاجزة جناح في فندق ال مدري وشسمه على الحرم .. واعيش احلى رمضان في حياتي
اجواء روحانية ايمانية بلا اجواء قرف واكل وازعاج ناس مفاجيع ماعمرهم انحرموا من الاكل او مايأذن المغرب هوووب على السفرة
ويعبون بطونهم مشافيح .. مقابر ماترد ميت كأنهم مجاعة افريقيا .. يقضون اول شي على الطبق الرئيسي اللي الكل يحبه
وبعدها يبدأون في الاطباق الجانبية ..طبع احنا ياحليلنا البنيات اللي نجهز السفرة من الى .. للرجال المفاجيع ..

ياكرهي للرجال (هذا المستخدم سوف يبدأ في سب الرجال )
الرجال ومأدراك الرجال .. عندنا عائلة تقدس الرجال
اهم شي الرجال اغرفوا للرجال زيدوا للرجال .. اول شي الرجال
الرجــــل اولا >> هو مبدأ هذه العيلة
ومن هذا المنطلق انا انادي بأن الرجال هم اللذين ياخذون حقهم في هذه الحياة :(
والبنات مهضوم حقهم ..
ياليتني ولــد .. يعني على الاقل اذا ضاق صدري اقوم اركب سيارتي وألف في البلد ..
صحيح انها بلد معفنة وكلها مطبات وريحتها معفنة وزحمة بس على الاقل تغيير جو .. يعني -ريحة ابو علي ولا عدمه - :(


مدري بس حسيت اني نطيت من سالفة الى سالفة ... والله بعذري من الحرّة اللي فيّا :(

هذا والله على ماأقول شهيد *.*


ولنا لقاءات آخرى من الفضفضة .. ^^